סטרוקטור פֿון די ביבליאָגראַפֿישע קאַרטלעך

די ביבליאָגראַפֿישע און טעכנישע אינפֿאָרמאַציע וועגן די אינדעקסירטע פּובליקאַציעס ווערט פֿאָרגעשטעלט אין דער פֿאָרעם פֿון “ביבליאָגראַפֿישע קאַרטלעך” לויט אַ ריי פֿאָרויסבאַשטימטע רובריקן.
די קאַרטלעך ווערן רעדאַקטירט אין ייִוואָ־אויסלייג, אַחוץ בײַ די טיטלען און אונטערטיטלען פֿון די פּובליקאַציעס, וואָס שפּיגלען אָפּ גענוי די פּרטים אָנגעגעבן אויפֿן שער־בלאַט, נאָר מיט מאָדערניזירטע דיאַקריטישע סימנים.

די רובריקן זענען די ווײַטערדיקע:

טיטל:

ווערט פֿאַרצייכנט אויף ייִדיש, ווי עס שטייט אויפֿן שער־בלאַט פֿון דער פּובליקאַציע.
עס ווערן פֿאַרצייכנט ענדערונגען אינעם טיטל, אויב אַזעלכע זענען פֿאָרגעקומען במשך פֿון דער צײַט.

יענע פּובליקאַציעס וואָס זענען אַרויס ווי בײַלאַגעס מיט אַ באַזונדערן טיטל, פֿרעקווענץ אָדער פּאַגינאַציע ווערן פֿאָרגעשטעלט אויף באַזונדערע קאַרטלעך, מיט אָפּשיקן צו די געהעריקע הויפּטקאַרטלעך.
אינעווייניקסטע בײַלאַגעס ווערן בלויז דערמאָנט אין אַ הערה.

אונטערטיטל:

אויב אַזאַ איז פֿאַראַן, ווערט ער פֿאַרצייכנט אויף ייִדיש ווי ער שטייט אויפֿן שער־בלאַט.

אָרט:

ווײַזט אָן אויף דער שטאָט (אָדער שטעט) וווּ די פּובליקאַציע איז אַרויס.

אין די פֿאַלן, ווען דאָס אָרט פֿון רעדאַקציע איז נישט אָנגעוויזן, האָט מען זיך געשטיצט אויף אַנדערע סימנים צי דרויסנדיקע מקורים. דער פּרט ווערט דעמאָלט אָנגעגעבן צווישן קאַנטיקע קלאַמערן.

פֿרעקווענץ:

 ווײַזט אָן אויף דער עיקרדיקער פּעריאָדישקײט פֿון דער פּובליקאַציע: טאָגצײַטונג, וואָכנבלאַט, חודש־שריפֿט, אאַז”וו. לגבי אויסגאַבעס אָן באַשטימטער פּעריאָדישקײט, האָט מע געניצט דעם טערמין “נישט רעגולער”. דער אינדעקס נעמט אויך אַרײַן אויסגאַבעס וואָס זענען לכתּחילה פֿאַרטראַכט געוואָרן ווי “אײנמאָליקע” און אויך אַזעלכע וואָס צוליב פֿאַרשײדענע סיבות זענען זיי “אַרויס בלויז אײן מאָל”.

דאַטעס:

אין דער שורה ווערן אָנגעוויזן די דאַטעס פֿונעם ערשטן און דעם לעצטן נומער פֿון דער פּובליקאַציע (אָדער די אײנציקע דאַטע אין פֿאַל פֿון אַן אײנמאָליקער אויסגאַבע), ווי זײ שטײען אין מקור. דער נומער נעמט אַ מאָל אַרײַן דעם יאָרגאַנג. מע האָט פֿאַרצײכנט צווישן קאַנטיקע קלאַמערן די דאַטעס וואָס ווערן געבראַכט אויפֿן סמך פֿון דרויסנדיקע מקורים.

בײַ אַ ריי פּובליקאַציעס אַרויס אין דער רוסישער אימפּעריע (ביז 1917) האָט מען אָנגעגעבן סײַ די יוליאַנישע סײַ די גרעגאָריאַנישע דאַטע.
אין פֿאַל ווען די דאַטע ווערט פֿאַרצײכנט אויף דער פּובליקאַציע נאָר לויטן ייִדישן לוח האָט מען אָנגעגעבן צווישן […] די אַלגעמײנע דאַטע.
בײַ געוויסע פּובליקאַציעס האָט מען אויך פֿאַרצייכנט דעם יאָרגאַנג לויטן ייִדישן לוח.

אַרויסגעגעבענע נומערן:

דאָ ווערן אויסגערעכנט לויט יאָרן די צאָל אַרויסגעגעבענע נומערן פֿון דער פּובליקאַציע, ווען די פּובליקאַציע האַלט אַ נאָכאַנאַנדיקע נומעראַציע ווערט דאָס אָנגעוויזן צווישן קלאַמערן.
אין די הערות ווערן פֿאַרצייכנט אומרעגולערקייטן אין דעם גאַנג פֿון דער פּובליקאַציע, ווי למשל: הפֿסקות, קאָנפֿיסקירטע נומערן, שפּרונגען אין דער נומעראַציע…

אינדעקסירט:

ס’רובֿ פּובליקאַציעס האָט מען אינדעקסירט “אין גאַנצן”.
אויב ניט, ווערן פֿאַרצייכנט די נומערן וואָס מע האָט נישט געהאַט צו זיי קיין צוטריט נאָך די ווערטער: “אין גאַנצן אַחוץ…” אָדער “פֿעלט…”.

אינפֿאָרמאַציע וועגן רעדאַקטאָר / אַרויסגעבער / אינסטיטוציע / פֿאַרלאַג:

אונטער דער רובריק “רעדאַקטאָר” האָט מען געוויינטלעך פֿאַרצײכנט בלויז דעם פֿאַקטישן רעדאַקטאָר (נישט דעם נאָמינאַלן).

מקורים:

הויפּט־מקורים בײַם דערגאַנצן פּרטים וועגן די פּובליקאַציעס זענען:

אונגער

אונגער, מנשה, “ביבליאָגראַפֿיע פֿון דער ייִדישער פּרעסע אין ארץ־ישׂראל”, זאַמלבוך לכּבֿוד דעם צווײ הונדערט און פֿופֿציקסטן יובֿל פֿון דער ייִדישער פּרעסע 1686–1936, רעד’ יעקבֿ שאַצקי, ניו־יאָרק 1937, זז’ 136–174.
(דירעקטער צוטריט)

טאַמבור

טאַמבור, וואָלף, ייִדיש־פּרעסע אין רומעניע (בײַטראָג צו אַ מאָנאָגראַפֿיע), בוקאַרעשט 1977.
(דירעקטער צוטריט)

סלוצקי

סלוצקי, שלמה, אַבֿרהם רייזען – ביבליאָגראַפֿיע, ניו־יאָרק 1956.
(דירעקטער צוטריט)

פּנקס

ביקל, ש. – בעז, ח. (רעד’), פּנקס פֿאַר דער פֿאָרשונג פֿון דער ייִדישער ליטעראַטור און פּרעסע, בענד 1–3, ניו־יאָרק 1965–1975.

פּראַגער

Prager, Leonard, Yiddish literary and linguistic periodicals and miscellanies – A selective annotated bibliography, Darby 1982.

קירזשניץ

קירזשניץ, אַ., די ײִדישע פּרעסע אין דער געוועזענער רוסישער אימפּעריע, 1823–1916, מאָסקווע–כאַרקאָוו–מינסק 1930.

רײזען 1914

רייזען, זלמן, “ײִדישע פּעריאָדישע אויסגאַבן 1686 – 1913”, לעקסיקאָן פֿון דער יודישער ליטעראַטור און פּרעסע, וואַרשע תּרע”ד 1914, זז’ 661–742.
(דירעקטער צוטריט)

רייזען 1928

רייזען, זלמן, לעקסיקאָן פֿון דער ײִדישער ליטעראַטור, פּרעסע און פֿילאָלאָגיע, בענד 1–4, ווילנע תּרפּ”ט–תּר”ץ, 1928–1929.
(דירעקטער צוטריט)

שיינטוך

שיינטוך, יחיאל (רעד’), רשימת היומונים וכתבי־העת ביידיש שפורסמו בפולין בין שתי מלחמות העולם; רשימה פֿון צײַטונגען און צײַטשריפֿטן אַרויסגעגעבן אויף ייִדיש אין פּוילן צווישן ביידע וועלט־מלחמות, ירושלים תשמ”ו 1986.

שמערוק

שמערוק, ח. (רעד’), פרסומים יהודיים בברית־המועצות, 1917–1960, ירושלים תשכ”א.

צו געפֿינען:

עס ווערן פֿאַרצייכנט די ביבליאָטעקן און אַרכיוון וווּ עס ווערן אָפּגעהיט די אָריגינעלע אויסגאַבעס וואָס מע האָט געניצט בײַם אינדעקסירן, ווי אויך די שייכדיקע סיגנאַטורן וואָס זענען דעמאָלט געווען אין באַניץ בײַ יענע אינסטיטוציעס.
באַזונדער ווערן אויך צוגעגעבן פֿאַרבינדן צו עקסיסטירנדיקע דיגיטאַלע קאָפּיעס.

 די ביבליאָטעקן און אַרכיוון ווערן אָנגעוויזן דורך ראָשי־תּיבֿות מיט לאַטײַנישע אותיות, לויטן ווײַטערדיקן שליסל:

BAR
ביבליאָטעק פֿון דער רומענישער אַקאַדעמיע, בוקאַרעשט
Biblioteca Academiei Române, Bucuresti

CZA
צענטראַלער ציוניסטישער אַרכיוו, ירושלים
The Central Zionist Archives, Jerusalem

ICJ
אינסטיטוט פֿאַר דער פֿאָרשונג פֿון הײַנטצײַטיקן ייִדנטום, ירושלים
The Avraham Harman Institute of Contemporary Jewry, Jerusalem

MCY
פּאַריזער ייִדיש־צענטער – מעדעם־ביבליאָטעק, פּאַריז
Maison de la Culture Yiddish – Bibliothèque Medem, Paris

NLI
די נאַציאָנאַלע ביבליאָטעק פֿון ישׂראל, ירושלים
The National Library of Israel, Jerusalem

YBZ
יד יצחק בן־צבֿי, ירושלים
Yad Izhak Ben-Zvi, Jerusalem

YIVO
ייִדישער וויסנשאַפֿטלעכער אינסטיטוט, ניו־יאָרק
YIVO Institute for Jewish Research, New York